Hati Sebagai Pusat Untuk Memperoleh Pengetahuan Yang Baik

Tema Minggu : Beritakan Injil : Saling Mengampuni dan Janganlah Angkuh
Nas Bacaan : 1 Yohanes 2 : 7 - 14 (Tematis)

Persekutuan keluarga yang Tuhan Yesus sayang...hari ini katong su ada di konci usbu ni. Dalang ibadah binakel ini Tuhan pung utusang yang nama Yohanes tu mau bilang lai par katong soal Tuhan pung parenta. Parenta tu Tuhan bilang akan par orang tatua, par jujaro dengn mongare, la par anana lai, yaitu dong seng bisa bilang kalo dong tinggal dalang tarang kalo dong masi binci dong pung sudara. Tagal kalo masi binci sodara itu akan pung arti dong masi ada dalang galap.

Di sini Tuhan utusang Yohanes mau kasi inga Mama, Papa deng Anana, mari hidop laeng sayang laeng, Papa sayang Mama, baitu lai Mama musti sayang Papa. Jang tagal mama su kurang cantik la papa seng sayang mama lai, papa pi sayang par orang laeng. Bagitu lai mama, jang tagal papa su pansiong, gaji su kacil, la mama seng perlu deng papa lai. Itu contoh sa, atau anana, tagal dong su basar, su skola tinggi, la anggap mama deng papa tu seng tau apapa, la mulai kurang ajar par dong, biking dong mara. Kalo dong bicara satu, anana su jawab saratus.

Sakali lai, katong dapa kasi inga supaya hidop laeng sayang laeng, laeng taru hormat par laeng, itu Tuhan pung perenta. Kalo katong biking akang, Tuhan pung hati sanang tarus katong dapa berkat.

Salamat konci usbu, salamat siap hati par ibadah Minggu lai. (MKT)

Doa : Bapa, katong tau Tuhang seng minta dari katong. Yang Tuhan minta cuma katong hidop laeng sayang laeng.. Katong mau biking akang Tuhan, mar kadang katong seng mampu, jadi kasi kuat katong Bapa ee...Amin!